Presheve 2014

© Rozafa Shpuza-All Rights Reserved.
Nandor 2014

Teka semaforesh

Balta endacake e Lanës pret tërthor bulevardin zhurmëmadh.
- Fffu...fffu - lëpin ethshëm brinjet e lëmyshkuna që e shtërngojnë si hinkë makthesh. Në bark ka përpie mllefin e periferive, prandaj nget e nget pa e kthye kryet, me shpresë se kësaj here ka me i pshtue përdhunimit e s’ka me u mbarsë rishtas.
Era asht gati me e zhgulë e me e vërvitë në ket shtrat mëkatar teneqen, ku feksin indiferente shkronjat e destinueme me kujtue nji shpirt të bamë zhari në turre drush. 
Bash njaty, bri vringëllimit cingërits të “Zhan d’Arkut”, zhbirilojnë terrin e kuqluem prej semaforit dy sy të mshehun  nen nji shall mavi,thakët e të cilit varen si jele dhimbjesh.
Mbi xhamat e makines, ndalun njitë me majat e gishtave te saj,  pasqyrohet hukama e nates. Nji dorë zgjatet heshtaz. Retinat, permbytun  kujtimesh  t'ithta, luten...  teksa buzët kanë ba qull palat e shallit qe rreken me ia vjedhe fjalet e pathana...
Saora, jeshilja e ban me mbledhë grushtin bosh. Si për inat, teneqja mbi krye gërset edhe ma mnershëm. 
Nuk e njef Zhan d’Arkun, por ndihet mirë që ajo i ban shoqni n’kët natë me fishkëllima të kithëta teneqesh... 

R. Shpuza

Shëngjin - Album fotografik

Shengjin, nandor 2014
© Rozafa Shpuza

Nadja e mirë!

Ndër poret e gjethve

vizllojnë inxhitë e vesës

të papërlyeme prej llurbës

së moteve.

Nadja pulit qerpikët

mbarsë me andrra tinëzare

e nji puhizë e bardhë

davarit mjegullën e nderun

pullazesh.

Diku çilet nji arkapi

endun thuprash të thata

e maza e tamblit gufon

prej kënaqësisë

në kusinë dyrrfanshe.

Minaret e kumbonat

rimojnë refrene të moçme

tue miklue

shpirtin e gjithkujt,

e Shkodra i uron

nadja e mirë

rrugicave të kapërthyeme

me reze t’randa dyersh.

(nga libri ANIPSE - Rozafa Shpuza )

Idil dritaresh - Shkoder

Shkoder 2014
© Rozafa Shpuza-All Rights Reserved.