Porta e poreve - poezi

                                                                Foto: R. Shpuza

Nata ulërin fytyrëçjerrë

ndër ulluqet e vajtuem

të pullazeve flirtues

që rrokullisin n’theqafje

atë kënaqësi t’përhanun.

Sa pak zgjat andrra

e askush s’ kujtohet

për portën rebele të poreve

që thithin të etuna

nektarin e sekreteve epshore...

por asgja nuk zhbahet,

anipse mbetë peng

lamtumirash solemne

për me u rikthye

as vetë s’di se kur.

(...nga libri "Anipse" R. Shpuza)

Hapat - poezi

                                                           Foto: R. Shpuza

Në trokun e belbët

që ritmon trotuaresh

me pllaka të thyeme,

kafshue dhimbshëm

prej takash t’nalta

e çizmesh t’baltosuna,

hidheni ethshëm

ndër mirakandje takimesh,

t’vonuem nguteni

ndër axhenda të shkyeme

e kur mbërrini

ndër stacione pritjesh,

shpërbaheni.

(...nga libri "Anipse" R. Shpuza)

Rozafës - poezi

                                                         Foto: R. Shpuza

Ndër kambë të blerta
ujnash që vorbullojnë
frikshëm
e ngutshëm vërshojnë
për kushedi se ku.

Ndër rrjeta t'imta peshkatarësh
që hidhen ambëlsisht
e mblidhen ethshëm në lundrën

që përkundet valësh.
Naltohen
do mure t'moçme
blatue me tamël shekullor

që pikon pa prâ

prej gjinjsh të ngurosun

ndër legjenda.

(... nga libri "Anipse" R. Shpuza)

Parmak - poezi

                                                                Foto: R. Shpuza

Mbi gjurmët e prekjeve

të dikurshme,

stivohen të rejat,

në qasje të rropamës

së hapave imcakë.

Ninulla e dërrasave

të moçme

përkund mirazhet

e shpirtrave të mekun

nga frymë t’acarta

dimnash hujli.

Njitem e ulem pa prâ

tue përkëdhelë gjurmët

e bjerruna

ndër rrënoja stinësh.

(...nga libri "Anipse" R. Shpuza )