Narcizisëm fals

Prap vranët sot. Grija sikur i ka ngjye flokët e ajo i përngjet nji shtëllunge tymi të saposhkëputun nga nënbarku i shkalafitun i autobusit urban që kalamendet në rrugën e zhurmshme.

Krejt e përhumbun pret në stacion. Kollaj mundesh me e krahasue me nji personazh të teatrit të kukllave që u bindet tekave të duerve poshtë tij. Sa bjen muzgu del nga klinika e zymtë, ku ju ka shërbye atyne që ankohen, vuejnë e shfryjnë dhe pret autobusin për në shpi... Ndoshta i asht ngjitë në lëkurë zbehtësia e të sëmurëve e prandaj nuk din me dallu të bukurën përreth saj!

Ulë sytë e turbullt prej lodhjes e shef trupin e vet. Gjoksi mezi i dallohet, kurse kofshët thatime zgjaten si kërcunj pa krijue asnji formë joshëse. Pellgu, bri kambëve të mbërthyeme në bordurë, ia shformon tiparet. Flokët i janë ngjeshë e fytyra i zgjatet si dama ndër letrat e bixhozit. Nervoze, heq lastikun me të cilin ka lidhë bishtalecin e krelat i hapërdahen në erë. Zgavrat e hundës pikturohen në syprinën mashtruese të errta e të zmadhueme. E trembun prej kësaj shëmtije ngre kryet nalt, ku nji trumnajë zogjsh vorbullohet ankthshëm e skalit ndër re' mbishkrimesh abstrakte.

Te dera e autobusit njerëzit shtyhen e ngjeshen me njeni-tjetrin. Ajo ka fat se turma e shtyn afër dritares, ku shpejton me nxjerrë kryet. Tue shpupurishë gacat, gështenjapjekësi në trotuarin përballë, i buzëqesh djallëzisht. Nuk i ven randësi eksitimit të tij se autobusi niset me turfullim. Por nuk kalon asnji minut e semafori i kuq e ban me u kryqëzue me gjuhën e taksistit që lëpihet ndër buzët e tij të thame. Kthen me marifet sytë me pa dritaret e tjera, por ato janë të mbylluna e askush tjetër përveç saj nuk e ka joshë taksistin.

-         Çka po ndodh sot? – belbëzon, teksa mollzat i janë skuqë.

-    Ejjj seksi, - merr si përgjigje fishkëllimën e shpërndarësit të picave, që bahet erë me motoçikletë sapo semafori jeshilon.

   Ma në fund duket stacioni i saj e ajo ngutet me dalë. Merr frymë me shpejtësi e pëllambët e duerve i janë lagshtue. Nuk i ka ndodhë kurrë ma parë me tërhekë vëmendjen e meshkujve. Kontrollon me marifet mos e ka fajin bluza që ka veshë, por ajo as që vehet re me atë ngjyrë të shplame.

   Shkapërcen rrugën, tue shpejtue hapat teksa autobusi zbrazet e rimbushet. Kurioze kthen kryet. Shtanget. Nji modele që reklamon të brendshmet intime i buzëqesh tanë sensualitet prej autobusit kabah. Dritarja e hapun zijon fiks mbi qafën e saj, afër tentenave të tejdukshme që rreken me ba zap’ gjoksin e saj të bashëm...

Tetor 2013 

  Rozafa Shpuza